Arkeologët kanë zbuluar 40 varre të lashta në Irakun e goditur nga thatësira, pasi niveli i ujit në rezervuarin më të madh të vendit ka rënë.
Varret, që besohet të jenë më shumë se 2300-vjeçare, u zbuluan në brigjet e rezervuarit të Digës së Mosulit në rajonin Khanka të provincës Duhok në veri të vendit, raporton Al Jazeera.
“Deri më tani kemi zbuluar afërsisht 40 varre”, tha Bekas Brefkani, drejtor i Institutit të Antikiteteve në Duhok dhe udhëheqës i punës arkeologjike në vend.
Ekipi i tij eksploroi zonën në vitin 2023, por dalloi vetëm pjesë të disa varreve.
“Vetëm këtë vit, kur nivelet e ujit arritën pikat e tyre më të ulëta, ne ishim në gjendje të hynim në vend dhe të fillonim gërmime serioze”, tha Brefkani.
Iraku është prekur nga thatësira të mëdha për pesë vjet me radhë, por falë kësaj, arkeologët arritën të dallonin mbetjet e varreve që janë mijëra vjeçare.
“Thatësirat kanë një ndikim të rëndësishëm në shumë aspekte, siç janë bujqësia dhe energjia elektrike. Por ato na lejojnë ne arkeologëve të kryejmë gërmime “, tha Brefcani.
Sipas tij, besohet se varret e zbuluara rishtazi vijnë nga periudha helenistike ose helenistike-seleukide.
Ai shtoi se ekipi i tij po punon për të gërmuar varret për t’i transferuar ato në Muzeun e Duhokut për studime dhe ruajtje të mëtejshme, përpara se zona të përmbytet përsëri.
Iraku, i cili është veçanërisht i ndjeshëm ndaj efekteve të ndryshimeve klimatike, përballet me temperatura në rritje, mungesa kronike të ujit dhe thatësira që ndodhin vit pas viti.
Autoritetet kanë paralajmëruar se ky vit ka qenë një nga më të thatët që nga viti 1933 dhe se rezervat e ujit kanë rënë në vetëm tetë për qind të kapacitetit të tyre të plotë.
Ekspertët përmendin ndryshimet klimatike dhe një numër të madh digash të ndërtuara në lumenjtë Tigër dhe Eufrat në vendet fqinje të Turqisë dhe Iranit, të cilat e zvogëlojnë më tej rrjedhën e ujit në Irak, si shkaqe të kësaj situate.
