Komisioni për Çështjet Europiane u mblodh paraditen e sotme jashtë sesionit parlamentar për të shqyrtuar projekt-pozicionin negociues për Grupkapitullin e V-të “Burimet, bujqësia dhe kohezioni” në negociatat me BE-në.
Kryetarja e Komisionit, Jorida Tabaku, e cilësoi mbledhjen antikushtetuese dhe refuzoi të merrte pjesë, duke theksuar se opozita ka prioritet procesin e integrimit me nisjen e sesionit të ri parlamentar. “I sqarova qeverisë se mbledhja jashtë sesionit është antikushtetuese. Opozita do të bëjë gjithçka për të mbrojtur procesin e integrimit,” deklaroi Tabaku.
Nga ana tjetër, socialistët argumentuan se mbledhja ishte e domosdoshme për të mos rrezikuar konferencën ndërqeveritare me BE-në më 2 shtator. Nënkryetarja e Komisionit, Etilda Gjonaj, theksoi se mbledhja ishte e ligjshme dhe bazuar në rregulloren e parlamentit. “Mbledhja ishte urgjente për depozitimin e pozicionit negociues për klasterin 5 me datën 2 shtator,” tha Gjonaj. Ajo shtoi se, pasi kryetarja nuk e thërriti mbledhjen, u aktivizua e drejta e ¼ të anëtarëve për ta thirrur atë.
Tabaku reagoi duke thënë se kishte propozuar zgjidhje praktike për të kaluar ngërçin, por qeveria kishte vepruar në mënyrë njëanshme. “Asnjë nga deputetët që sot thirrën mbledhjen nuk janë të rizgjedhur dhe nuk kanë legjitimitet për të thirrur mbledhje jashtë sesionit,” deklaroi kryetarja e Komisionit.
