Policia e Tiranës njoftoi sot se Kristian Konit, 45-vjeçarit të arrestuar për trafik droge në Itali, i janë sekuestruar pasuri në vlerë rreth 26 milionë e 500 mijë euro, përfshirë 19 prona, 2 automjete dhe 20 llogari bankare të regjistruara në emër të tij.
“Specialistët e Seksionit për Hetimin e Pastrimit të Parave, në bashkëpunim me specialistët e Agjencisë së Administrimit të Pasurive të Sekuestruara dhe të Konfiskuara, në kuadër të një procedimi penal të drejtuar nga Prokuroria e Tiranës, ekzekutuan vendimin e Gjykatës së Tiranës për sekuestrimin e pasurive në pronësi të shtetasit K. K., alias O. M., 45 vjeç, i dënuar më parë për veprat penale “Vrasja me paramendim” dhe “Trafikimi i lëndëve narkotike”, kryer në kuadër të grupit të strukturuar kriminal.”, njofton policia.
Pasuritë e sekuestruara përfshijnë prona në Tiranë, Bathore, Farkë dhe Marikaj, dy automjete luksoze të llojit Range Rover dhe Smart, si dhe llogari bankare të individëve dhe subjekteve juridike të përfshirë në hetim. Në mesin e pasurive është edhe kompania “Kriol.AL” sh.p.k., me përfaqësues ligjor Kristian Konin.
Hetimet zbulojnë se Konit dhe nëna e tij kanë kryer veprimtari të lidhura me rrjetin e strukturuar kriminal të trafikut të narkotikëve në Itali gjatë periudhës 2007–2012, duke përdorur identitete të ndryshme dhe transaksione financiare të pajustifikuara.
Sipas të dhënave të medias, Koni, i njohur edhe si Olsi Meta, ka investuar paratë e trafikut të narkotikëve kryesisht në sektorin imobiliar, duke krijuar një rrjet kompanish që shërbente për pastrim parash. Në vitin 2021 ai themeloi firmën Kriol.al, me aktivitet në eksport automjetesh, shit-blerje pronash, reklamim, konsulenca dhe tregti frutash e perimesh. Në vitin 2023, Koni themeloi kompaninë Azul Rooms, që operon në dhënien e apartamenteve me qira dhe marketing, pjesa më e madhe e aktivitetit të të cilave dyshohet se ishte fiktive për të justifikuar lëvizje financiare.
LEXO EDHE:
Vila, kompani dhe makina luksoze, sekuestrohen pasuritë e biznesmenit të imobiliarëve
