Teksa na ndajnë pak ditë nga ndeshjet e Kombëtares Shqiptare, sinjale pozitive për formën e futbollistëve kanë ardhur nga Turqia për teknikun Sylvinho. Dyshja e kombëtares shqiptare, Taulant Seferi dhe Arlind Ajeti, shënuan në fitoren 3-1 që Bodrumspori regjistroi kundër Sakaryasporit në javën e tretë të Kategorisë së Parë në Turqi.
Qendërmbrojtësi shënoi golin e epërsisë 2-1 në minutën e 60-të, duke shfrytëzuar shpërqendrimin e mbrojtjes kundërshtare në ekzekutimin e një goditjeje këndi.
Goli i parë për Ajetin në këtë sezon dhe me fanellën e Bodrumsporit ku aktivizohet prej edicionit të shkuar.
Pak minuta më pas, ishte Seferi ai që gjeti rrjetën. 28-vjeçari shënoi golin e tretë dhe të dytin personal radhazi, teksa realizoi edhe në ndeshjen e shkuar.
Me këtë fitore, Bodrumspori u ngjit në kuotën e 5 pikëve në renditje, teksa pretendon rikthimin në elitën e futbollit turk në fund të sezonit.
