Një krim i rëndë në familje ka tronditur Greqinë, pasi një 40-vjeçar shqiptar, Pandeli Nakoleci, vrau gruan e tij 36-vjeçare, Marjola, para syve të katër fëmijëve të tyre, pas një sherri të ndezur për shkak të xhelozisë.
Sipas mediave greke, ajo që e çoi autorin drejt krimit ishte një mesazh i gjetur në celularin e viktimës, që e bëri të dyshonte për një lidhje jashtëmartesore. Nën ndikimin e drogës dhe me probleme psikiatrike, ai e qëlloi të shoqen me thikë në qafë dhe shpinë, fillimisht brenda apartamentit. Gruaja tentoi të shpëtonte duke u larguar, por ai e ndoqi poshtë shkallëve dhe e goditi sërish, derisa ajo u rrëzua mbi një vetratë xhami që e theu duke marrë plagë fatale.
Raportimet flasin se 40-vjeçari kishte qenë i varur nga droga dhe me histori të gjatë problemesh të shëndetit mendor. Në vitin 2019 ishte arrestuar tre herë për trafik dhe posedim lëndësh narkotike, ndërsa pas një qëndrimi të shkurtër në burg, përballonte vështirësi financiare dhe depresion. Më 28 qershor 2025, ai ishte shtruar në një klinikë psikiatrike pasi tentoi vetëvrasje.
Fqinjët e çiftit treguan se panë gruan e mbuluar me gjak dhe autorin duke vrapuar i shqetësuar. “E pashë me një mjet të mprehtë në dorë, po bërtiste dhe ishte zbathur”, tha një banor i zonës.
Fëmijët e çiftit, të moshës 5 deri në 18 vjeç, janë dëshmitarë të drejtpërdrejtë të tragjedisë. Njëri prej tyre i tha policisë në gjendje shoku: “E pashë babin duke e goditur mamin me thikë”.
