Deputetja e Partisë Demokratike, Jorida Tabaku, është shprehur se emigracioni masiv është kthyer në “dramën e vërtetë” të ekonomisë shqiptare, duke ndikuar drejtpërdrejt tek konsumi, shpenzimet dhe punësimi.
Në një video të publikuar në rrjetet sociale, Tabaku u ndal te të dhënat e fundit të INSTAT, sipas të cilave punësimi i personave mbi 64 vjeç është rritur me 7.9%. Sipas saj, kjo tregon plakjen e tregut të punës dhe humbjen e forcës konkurruese që kishin të rinjtë.
Ajo argumentoi se rritja e taksave, vështirësitë për blerjen e apartamenteve, pasiguria në punësim dhe barrierat për hapjen e bizneseve kanë goditur sidomos shtresën e mesme, duke e shtyrë drejt emigrimit.
Deputetja theksoi se modeli aktual ekonomik duhet të ndryshojë, ndërsa kërkoi politika fiskale që favorizojnë punën dhe zhvillimin. “Shqipëria duhet t’i japë vlerë punës, ta promovojë dhe ta mbështesë atë. Ky sistem duhet të ndryshojë,” u shpreh Tabaku.
