Komisioni i Prokurimit Publik (KPP) ka urdhëruar anulimin dhe rishpalljen e tenderit 6.2 milionë euro të shpallur nga Agjencia Kombëtare e Shoqërisë së Informacionit (AKSHI) për mirëmbajtjen e pajisjeve të sigurisë në burgjet e vendit. Vendimi u mor pas konstimit se procedura ishte zhvilluar në shkelje të ligjit, pasi nuk ishte argumentuar pse kontrata ishte bërë në një lot të vetëm. KPP kërkon tashmë ndarjen e saj në disa lote dhe përsëritjen e garës me kritere të reja për të garantuar konkurrencë të barabartë.
Ankesat për kriteret përjashtuese
Ky vendim erdhi pas ankesës së kompanisë AEES sh.p.k., e cila ka ngritur pretendime për mungesë transparence dhe përjashtim të operatorëve të tjerë nga gara. Në ankesë, AEES theksonte se kërkesat për certifikata specifike të lëshuara vetëm nga prodhuesit e pajisjeve Smiths Detection dhe sistemeve video VMS ishin kritere që praktikisht favorizonin një grup të ngushtë operatorësh: Advanced Business Solutions e Gerond Meçes dhe AlbaScan e Elton Jorgjis, kompani të cilat prej kohësh kontrollojnë segmentet kryesore të pajisjeve të sigurisë në burgje.
Skandalet e sigurisë në burgje
Publik.al ka raportuar më herët se këto kompani, pavarësisht tenderave milionësh, kanë dështuar në ofrimin e shërbimeve bazë të sigurisë.
Në dhjetor 2023, në burgun e Peqinit, i dënuari përjetë Sokol Mjacaj futi armë në qeli dhe vrau një të burgosur tjetër, ndërkohë që kamerat nuk funksiononin dhe skanerët ishin jashtë përdorimi. Pajisjet menaxhoheshin nga AlbaScan.
Vetëm pak javë më vonë, në burgun e Fierit, një tentativë arratisjeje nxori në pah të njëjtat probleme: kamera të fikura, alarme jashtë funksionit dhe mungesë kontrolli mbi mjetet e futura në qeli.
Edhe pse pas këtyre ngjarjeve ish-drejtori i Burgjeve Admir Braja dha dorëheqjen dhe në vend të tij u emërua Klevis Qose, kontratat vijojnë të mbeten në duart e kompanive të akuzuara për shërbime të dështuara dhe favorizime në tendera.
Dyshimet për kapje të tenderave publikë
Ky rast është një tjetër provë se si tenderat shumë-milionësh për sigurinë në burgje zhvillohen nën akuza për paracaktim fituesish dhe kushte të qepura sipas interesave të disa kompanive të lidhura politikisht. Publik.al ka denoncuar vazhdimisht faktin se AKSHI, përmes procedurave të mbyllura dhe kushteve të veçanta, ka krijuar monopole në sektorë jetikë të sigurisë.
Me urdhrin e fundit të KPP-së, tenderi duhet të rishpallet me kushte të reja dhe të ndahet në lote, gjë që do të testojë realisht integritetin dhe transparencën e prokurimeve publike në fushën e sigurisë. Por pyetja që ngrihet është: a do të mbyllet sërish gara me të njëjtët fitues të paracaktuar, apo më në fund do të ketë konkurrencë reale?/ Publik Media
