Gjykata Speciale në Hagë ka vendosur kufizime për vizitat e ish-presidentit Hashim Thaçi në paraburgim. Sipas vendimit të gjyqtares Marjorie Masselot, 11 persona të caktuar nuk do të lejohen të vizitojnë Thaçin gjatë vizitave jo të privilegjuara.
Emrat e ndaluar përfshijnë Artan Behramin, Blerim Shalën, Ismail Sylën, Vllaznim Kryeziun, Milaim Ahmetajn, Milaim Cakiqin, Avni Kastratin dhe katër persona të tjerë, përfshirë disa nga vëllezërit e Thaçit.
Prokuroria kishte kërkuar ndalimin edhe të tre vëllezërve të tjerë, por kjo nuk u miratua. Ajo argumentoi se disa persona mund të komunikonin me Thaçin dhe të ndikonin tek dëshmitarët.
Mbrojtja e Thaçit, e udhëhequr nga Sophie Menegon, tha se këto kufizime janë të panevojshme dhe cenojnë të drejtën e ish-presidentit për jetën private dhe familjare.
