Banorët e Shëngjergjit kanë denoncuar publikisht një situatë alarmante që lidhet me shfrytëzimin e burimit të ujit “Krullia”, i cili ndodhet në zonën e tyre dhe ka një rëndësi jetike për komunitetin lokal. Në një deklaratë të drejtuar mediave, ata akuzojnë organet kompetente, përfshirë Komisariatin nr. 4 dhe institucionet lokale, se kanë injoruar ankesat dhe shqetësimet e banorëve, ndërkohë që i kanë dhënë mbështetje të hapur kompanisë “Burimi Krullia SHPK” me administrator Blerim Ndou nga Puka, e cila po zhvillon punimet në burim pa konsultim me publikun dhe pa transparencë mbi ndikimet afatgjata në mjedis dhe furnizim me ujë.
Sipas banorëve, jo vetëm që nuk janë dëgjuar, por janë përballur edhe me presion dhe kërcënime të vazhdueshme për të mos kundërshtuar punimet, pavarësisht se ky projekt ndikon drejtpërdrejt në të drejtën e tyre për akses në ujë të pastër dhe në një mjedis të sigurt. Ata kërkojnë hetim të menjëhershëm të të gjitha procedurave të ndjekura nga kompania dhe institucionet publike, duke theksuar se situata po përkeqësohet dhe komuniteti po lihet pas dore.
Një tjetër shqetësim i ngritur nga banorët është edhe pranisë së rreth 10 dyqaneve aktive në Tiranë që, sipas tyre, përdorin logon “Shëngjergji” dhe “Krullia” për të tregtuar ujë të mbushur në mënyrë të dyshimtë, në kushte jo higjienike, nga kanale të panjohura. Ata kërkojnë ndërhyrje urgjente për ndalimin e kësaj praktike, duke theksuar se e gjithë popullsia e Tiranës po rrezikohet nga një produkt që nuk kontrollohet dhe nuk është i certifikuar.
Denoncim nga banorët e Shëngjergjit për ndihmën e organeve kompetente ndaj investitorit Burimi Krullia SHPK e Ndout dhe presionin ndaj popullatës
Të nderuar,
Ne, banorët e Shëngjergjit, dëshirojmë të denoncojmë një situatë shqetësuese lidhur me burimin “Krullia”, që ndodhet në zonën tonë dhe që ka një ndikim të drejtpërdrejtë në jetesën dhe mjedisin e komunitetit tonë. Pavarësisht ankesave të përsëritura dhe shqetësimeve që kemi ngritur ndaj organeve kompetente, të tilla si Komisariati nr. 4 dhe autoritetet lokale, kërkesat dhe denoncimet tona nuk janë marrë parasysh dhe janë injoruar.
Përkundrazi, janë vënë re veprime të papranueshme nga ana e organeve shtetërore, të cilat, në vend që të shqyrtojnë dhe të trajtojnë me seriozitet shqetësimet e popullsisë, kanë dhënë mbështetje të hapur ndaj investitorit “Burimi Krullia SHPK”, i cili po realizon punimet për shfrytëzimin e burimit të ujit. Po ashtu, janë shfaqur presione të vazhdueshme ndaj popullatës që të mos pengojnë ose kundërshtojnë punimet që lidhen me këtë projekt, pavarësisht faktit që ai ka pasoja të mëdha për mjedisin, furnizimin me ujë dhe të drejtat e komunitetit.
Shqetësimet tona përfshijnë:
- Ndikimi në furnizimin me ujë: Burimi “Krullia” është një burim i rëndësishëm për jetesën e banorëve të Shëngjergjit dhe të zonave përreth. Projektet që lidhen me shfrytëzimin e tij nuk janë konsultuar me komunitetin dhe nuk është bërë një vlerësim i plotë i pasojave për furnizimin me ujë të popullsisë.
- Injorimi i denoncimeve: Pavarësisht ankesave të shumta të qytetarëve për mungesën e transparencës dhe shqetësimet mbi ndikimin mjedisor dhe shëndetësor, organet kompetente kanë dështuar të marrin masa dhe të hetojnë këtë çështje me seriozitetin që meriton.Presioni ndaj qytetarëve: Ka pasur përpjekje të vazhdueshme për të ushtruar presion mbi banorët e zonës, duke i kërcënuar dhe duke i detyruar të mos kundërshtojnë ndërtimin dhe punimet për shfrytëzimin e burimit “Krullia”. Ky presion është një shkelje e të drejtave të njeriut dhe një shpërfillje e ligjit dhe standardeve të transparencës dhe pjesëmarrjes.
- Kërkojmë që të merren masat e nevojshme për të hetuar dhe për të ndaluar çdo veprim të paligjshëm dhe presion të padrejtë ndaj popullatës, si dhe për të siguruar që projekti “Krullia” të realizohet në përputhje me ligjin dhe me respektimin e të drejtave të komunitetit të Shëngjergjit.
Në këtë kontekst, kërkojmë:
- Hetimin e plotë të procedurave dhe veprimeve të ndërmarra nga organet kompetente dhe investitori “Krullia SHPK” për të verifikuar nëse janë respektuar ligjet dhe rregulloret për mjedisin dhe të drejtat e qytetarëve.
- Marrjen e masave për të ndaluar çdo formë presioni ndaj banorëve dhe për të siguruar që ata të kenë mundësinë të shprehin mendimet dhe shqetësimet e tyre pa frikë.
- Konsultim të plotë dhe transparent me komunitetin e Shëngjergjit në lidhje me këtë projekt dhe pasojat e tij
Publikojeni ju lutemi, me këto dyqane të rreme me logon e burimit Krulli pinë ujë gjithë populli i Tiranës. Janë me 10 dyqane aktivë që mbushin ujë nëpër kanale me bota, me logon Shëngjergji./ JOQ
