Komisioni Qendror i Zgjedhjeve ka nisur përgatitjet për zgjedhjet lokale të 12 tetorit, ndërsa tashmë ka filluar regjistrimi i votuesve nga diaspora, e cila do të mund të votojë vetëm me postë.
Sipas rregullave të reja, çdo shtetas që regjistrohet për të votuar jashtë vendit largohet nga lista e votuesve brenda Kosovës. Megjithatë, KQZ ka bërë të ditur se qytetarët kanë të drejtë të kthehen përsëri në listën e votuesve në Kosovë, nëse paraqesin kërkesë deri më 30 gusht 2025.
Procesi i regjistrimit për votuesit jashtë Kosovës ka nisur më 23 korrik dhe do të zgjasë deri më 29 gusht. Deri më tani, KQZ ka pranuar 7026 aplikime, prej të cilave 5445 janë miratuar dhe 1581 janë refuzuar.
Në këto zgjedhje, fletëvotimet do t’u dërgohen votuesve në adresat e tyre jashtë Kosovës. Pas votimit, ato duhet të kthehen me postë në adresën e Komisionit Qendror në Kosovë ose në kutitë postare që do të hapen në disa shtete të tjera, gjatë periudhës 17 shtator – 11 tetor 2025.
