Policia e Beratit, nën drejtimin e Prokurorisë, ka goditur një grup nga Skrapari që kultivonte dhe shiste lëndë narkotike kanabisi.
Në kuadër të operacionit të koduar “Bashkëpunimi” janë ekzekutuar 5 masa sigurie “Arrest në burg”, të caktuar nga Gjykata e Beratit. Më konkretisht, në pranga janë vënë shtetasit:
- Markos Qama, 25 vjeç dhe Serxho Hodo (Qama)., 30 vjeç (vëllezër), banues në Poliçan;
- Altin Zajmi, 41 vjeç, banues në fshatin Gostenckë, Skrapar;
- Emiljano Kapllani, 33 vjeç, banues në Poliçan;
- Sulejman Çelo, 28 vjeç, banues në fshatin Jaupas, Skrapar.
Ata akuzohen për veprat penale “Prodhimi dhe shitja e narkotikëve”, kryer në bashkëpunim dhe “Kultivimi i bimëve narkotike”, kryer në bashkëpunim.
Ndërkohë, autoritetet bëjnë me dije se kanë proceduar penalisht në gjendje të lirë, për veprën penale “Shpërdorimi i detyrës” edhe kryeplakun e i fshatit Jaupas, Skrapar, shtetasi S. Çelo, 46 vjeç (vëllai i shtetasit të arrestuar Sulejman Çelo).
Policia bën me dije se gjatë kontrollit në banesën e Sulejman Çelos ka sekuestruar 3 krehra arme zjarri automatike, 3 koka të dyshuara me përmbajtje eksplozivi, tub uji që dyshohet se furnizonte parcelën me 122 bimë narkotike.
Gjatë këtij operacioni janë ushtruar 15 kontrolle banesash dhe ambientesh të tjera, ku raportohet se janë sekuestruan në total 1 armë gjahu çifte, lëndë narkotike kanabis sativa, 7 aparate celularë dhe shuma monetare, të cilat dyshohet se janë përfituar nga veprimtaria kriminale.
Policia thotë se vijojnë veprimet hetimore, nën drejtimin e Prokurorisë, për dokumentimin e plotë të veprimtarisë kriminale të këtij grupi, si dhe për identifikimin dhe kapjen e shtetasve të tjerë të përfshirë.
Materialet proceduriale i kanë kaluar Prokurorisë së Beratit për veprime të mëtejshme.
