Pas takimit mes Presidentit amerikan Donald Trump dhe Presidentit rus Vladimir Putin në Alaska, liderët evropianë kanë lëshuar një deklaratë të përbashkët, duke nënvizuar se hapi tjetër duhet të jenë bisedime të mëtejshme, këtë herë me përfshirjen e Presidentit ukrainas Volodymyr Zelensky.
Deklarata nuk përmend thirrjet e fundit të Trump për një “Marrëveshje paqeje”. Presidenti amerikan shkroi në Truth Social se kjo do të ishte mënyra më e mirë për të përfunduar luftën në Ukrainë, në vend të një armëpushimi që sipas tij mund të mos “mbajë”, duke sinjalizuar një ndryshim të qasjes së tij.
“Liderët mirëpritën përpjekjet e Presidentit Trump për të ndaluar vrasjet në Ukrainë, për të përfunduar luftën e agresionit të Rusisë dhe për të arritur një paqe të drejtë dhe të qëndrueshme,” thuhet në deklaratën evropiane.
Deklarata vazhdon: “Siç tha Presidenti Trump, ‘nuk ka marrëveshje derisa të ketë marrëveshje’. Siç e parashikoi Trump, hapi tjetër duhet të jenë bisedime të mëtejshme duke përfshirë Presidentin Zelensky, të cilin ai do të takojë së shpejti.”
Zyrtarët evropianë shtuan se janë të gatshëm të punojnë me Trump dhe Zelensky-n drejt një samiti trilateral me mbështetje evropiane.
Ata theksuan gjithashtu nevojën që Ukraina të ketë “garanci sigurie të hekurt”, duke shtuar se “nuk duhet vendosur asnjë kufizim mbi forcat e armatosura të Ukrainës apo bashkëpunimin e saj me vende të treta. Rusia nuk mund të ketë të drejtë veto mbi rrugën e Ukrainës drejt BE dhe NATO-s.”
Deklarata u nënshkrua nga: Presidentja e Komisionit Evropian Ursula von der Leyen, Presidenti i Këshillit Evropian Antonio Costa, Presidenti francez Emmanuel Macron, Kryeministrja italiane Giorgia Meloni, Kancelari gjerman Friedrich Merz, Kryeministri britanik Keir Starmer, Presidenti finlandez Alexander Stubb dhe Kryeministri polak Donald Tusk.
