Policia e Korçës ka dalë me një komunikatë për mediat në lidhje me dhunimin e futbollistit të Skënderbeut, Saleh Nasr, ku bën me dije se ka arrestuar dy agresorët, teksa ka vënë nën hetim dhe katër persona të tjerë.
Në pranga janë vënë shtetasit Vangjel Jovani, 24 vjeç dhe Thanas Veshi, 24 vjeç, të dy banues në fshatin Polenë. Ndërkohë janë proceduar penalisht në gjendje të lirë shtetasit Th. V., 32 vjeç, banues në fshatin Polenë, A. Xh., 23 vjeç, banues në fshatin Bulgarec dhe J. O., 24 vjeç, banues në fshatin Rëmbec, për veprën penale “Plagosja e rëndë me dashje”, kryer në bashkëpunim.
Sipas bluve të Korçës, 5 shtetasit e mësipërm, në bashkëpunim me njëri-tjetrin kanë dhunuar sulmuesin egjiptian. Ata e kanë goditur disa herë në kokë 26-vjeçarin Saleh Nasr, duke i shkaktual lëndime serioze.
Ngjarja ka ndodhur mesditën e djeshme në lagjen nr. 16 të qytetit juglindor. Aktualisht Saleh Nasr është në spital në kujdesin e mjekëve dhe raportohet se ndodhet jashtë rrezikut për jetën.
Ndërkohë, është proceduar penalisht në gjendje të lirë, për veprën penale “Moskallëzimi i krimit” edhe shtetasi Dh. M., 25 vjeç, banues në fshatin Rëmbec.
Materialet procedurale i janë referuar Prokurorisë së Korçës, për veprime të mëtejshme.
