Milani i ka dhënë lamtumirën Malick Thiaw dhe menjëherë ka gjetur zëvendësuesin e tij.
Nga radhët e Genoas është afruar Koni De Winter i cili ka marrë vendin e lënë bosh nga gjermani. Një lëvizje shumë e shpejtë e Igli Tares, për t’i siguruar Alegrit një zëvendësues në lartësinë e duhur.
Pas vizitave mjekësore të kryera dje, sot ka ardhur firma në kontratë dhe zyrtarizimi i saj, me klubin e Milanit që e bëri publike më një njoftim, duke saktësuar se ai kishte firmosur deri në qershorin e vitit 2030.
Marrëveshja me Genoan kalon shumën e 20 milionë eurove, duke llogaritur edhe bonuset në varësi të klauzolave që mund të përmbushen.
De Winter spikati në akademinë e Juventusit, por nuk ia doli të çante në ekipin e parë. Ai u huazua te Empoli fillimisht e më pas u shit te Genoa, ku spikati me lojën e tij dhe u kthye në një lojtar që u interesonte klubeve të mëdha.
Në fillimin e verës ishte Interi që dukej pranë futbollistit, por Milani u tregua më i shpejtë në sigurimin e marrëveshjes sapo shiti Thiaw-n.
