Banorët e Nartës po përballen me pasojat e zjarreve që prej dy ditësh përfshijnë Gramshin dhe zonat përreth. Shumë prej tyre kanë humbur gjithçka nga flakët, ndërsa disa kanë arritur të shpëtojnë vetëm bagëtitë e tyre.
Një banor i Nartës, i cili ka folur për situatën përpara mediave, përlotet teksa tregon se ka arritur të shpëtojë bagëtitë duke i çuar te lumi. Megjithatë, ai shton se edhe ato nuk kanë më vlerë për të, pasi zjarret kanë shkatërruar gjithçka rreth tij.
“Çfarë të bëjmë, situata është e rëndë për të gjithë, jo vetëm për mua. I kam çuar bagëtitë në lumë, por këtu po digjet çdo gjë, ç’i dua edhe ato,” tha banori i përlotur.
Në Nartë dhe rrethinat e Gramshit, shumë familje janë të shqetësuara për shtëpitë, arat dhe pronat e tyre, ndërsa autoritetet po monitorojnë situatën dhe ndihmat për të prekurit po organizohen.
