Një zjarr i përmasave të mëdha ka përfshirë zonën e Hidrovorit në Novoselë, duke shkaktuar alarm dhe mobilizim të menjëhershëm të forcave zjarrfikëse të Vlorës.
Flakët, të ndihmuara nga era e fortë, janë përhapur me shpejtësi, duke rrezikuar përhapjen e zjarrit jashtë kontrollit dhe duke vështirësuar ndjeshëm ndërhyrjen e ekipeve të emergjencës.
Sipas informacioneve paraprake, zjarri ka nisur në një zonë me bimësi të dendur dhe është përhapur në drejtim të strukturave përreth, duke krijuar një situatë të rrezikshme për banorët dhe ambientin.
Zjarrfikësit po punojnë intensivisht për të izoluar vatrat aktive dhe për të shmangur dëmet e mëtejshme.
Burime nga vendngjarja bëjnë me dije se, nga mënyra e përhapjes dhe vendi i nisjes së flakëve, dyshohet për zjarrvënie të qëllimshme.
Policia ka nisur hetimet për të zbardhur rrethanat e ngjarjes dhe për të identifikuar autorët.
