Një ndjekje spektakolare mes qyteteve Albano Laziale, Ardea dhe Aprilia në Itali përfundoi me arrestimin e një shqiptari dhe sekuestrimin e një sasie të madhe droge dhe parave të gatshme.
Ngjarja ndodhi kur karabinierët e stacionit të Cecchinas i dhanë shenjë ndalimi një motoristi që po lëvizte me shpejtësi të lartë në rrugën Nettunense. I riu, në vend që të ndalonte, tentoi të largohej, por pas një ndjekjeje rreth 4 kilometrash u ndalua dhe u kap nga forcat e rendit.
Gjatë kontrollit të motorit, policia gjeti 24.800 euro të fshehura në bagazhin e tij, të cilat dyshohen se vinin nga veprimtari të paligjshme. Hetimet vazhduan edhe në banesat e të ndaluarit.
Në banesën e tij në Aprilia, policia sekuestronte 52 kilogramë drogë, përfshirë 45.7 kg hashash dhe mbi 6 kg marijuanë. Në banesën tjetër në Ardea, u gjetën 72.500 euro të tjera dhe disa shënime që lidhen me një rrjet të organizuar shpërndarjeje droge.
I arrestuari u dërgua në burgun e Velletrit, ndërsa hetimet për bashkëpunëtorët dhe rrjetin kriminal vazhdojnë.
