Presidenti i Serbisë, Aleksandër Vuçiç, njoftoi se nuk ka ndërmend të ndryshojë Kushtetutën për të kandiduar sërish për president. Ai theksoi se karriera e tij në këtë post do të përfundojë pas një viti e gjysmë.
“Unë jam një veteran politik dhe nuk mund të kandidoj më për president, dhe as nuk më shkon ndër mend të ndryshoj Kushtetutën për ta bërë këtë. Nuk jam diktator, siç më paraqes zakonisht media austriake,” tha Vuçiç gjatë një konference të përbashkët për shtyp me kancelarin austriak, Christian Stocker, në Beograd.
Ai shtoi se zgjedhjet në Serbi do të shpallen përpara afatit ligjor, por nuk dha një datë të saktë, duke theksuar se kjo vendoset nga institucionet shtetërore. Vuçiç gjithashtu deklaroi se do të mbështesë ata që mendon se mund ta çojnë vendin përpara, duke respektuar formën legjitime të shprehjes së pakënaqësisë përmes protestave dhe demonstratave, për sa kohë që ato nuk janë të dhunshme.
