Presidenti rus Vladimir Putin i ka dhënë një dekoratë përfaqësuesit special të presidentit amerikan Donald Trump, i cili ndodhej në Moskë për të diskutuar një plan për përfundimin e luftës në Ukrainë. Dekorata, urdhri i Lenin-it, iu dorëzua Steve Witkoff me qëllim që ai ta përcillte për familjen e Michael Gloss, 21-vjeçarit që u vra duke luftuar me forcat ruse në Ukrainë.
Michael Gloss ishte djali i Juliane Gallina-s, zëvendësdrejtoreshës së CIA-s për inovacionin dixhital. Lajmi për dekoratën u përhap ndërsa u konfirmua se Trump dhe Putin do të takohen në Alaska javën e ardhshme për të diskutuar të ardhmen e konfliktit ukrainas.
As Kremlini, as Ministria e Jashtme e Rusisë nuk kanë konfirmuar publikisht dhënien postmortale të Urdhrit të Lenin-it, një nderim sovjetik për shërbime të shkëlqyera civile, për Michael Gloss. Ende nuk është e qartë nëse familja ka marrë dekoratën.
Vdekja e Gloss u raportua për herë të parë në mediat ruse në prill 2024. CIA më pas njoftoi se ai vuante nga probleme të shëndetit mendor dhe se vdekja e tij nuk përbënte çështje të sigurisë kombëtare. Ai nuk ka qenë kurrë punonjës i CIA-s, sipas burimeve për CBS.
Sipas raporteve, Kremlini nuk ishte i vetëdijshëm për lidhjet familjare të Gloss në fillim. Ai u regjistrua në forcat ruse në vjeshtën e vitit 2023 dhe kishte postuar vetëportrete në Sheshin e Kuq të Moskës, duke shprehur mbështetje për Rusinë në atë që e quante “luftë proxy e Ukrainës”, ndërsa kritikonte mediat perëndimore si “propagandë perëndimore”.
Në një nekrologji të botuar në nëntor 2024 thuhej se Gloss u vra më 4 prill të atij viti në Evropën Lindore.
Babai i tij, veteran i luftës në Irak, Larry Gloss, tha në një intervistë për Washington Post se djali i tij kishte vuajtur gjatë gjithë jetës nga probleme të shëndetit mendor. Ai shprehu frikën se autoritetet ruse do të zbulonin lidhjet e familjes dhe do të përdornin Michael-in si “rekuizitë propagandistike”./BBC
