Policia e Durrësit ka arrestuar një person, i cili akuzohet se vidhte nëpër shezlongë dhe automjete sendet personale të pushuesve, teksa ai rezultonte i shpallur në kërkim edhe për vjedhje të tjera të kryera më parë.
Në kuadër të operacioni policor t koduar “Sendet” është vënë në pranga shtetasi Indrit Beqja, 42 vjeç, banues në Manzë, Durrës, i dënuar më parë po për vjedhje dhe i shpallur në kërkim për vjedhje të tjera.
“Nga hetimet e kryera dhe nga analizimi i pamjeve filmike, rezulton se ky shtetas është autor i vjedhjeve nëpër shezlongë të sendeve personale të pushuesve, si dhe i vjedhjes së një automjeti në Shkozet, Durrës.
Në bashkëpunim me Prokurorinë, vijon puna për dokumentimin e plotë ligjor të veprimtarisë kriminale të këtij shtetasi në fushën e vjedhjes së pronës, pasi dyshohet si autor i disa vjedhjeve të ndodhura më parë në territorin e qarkut Durrës.” – njoftojnë autoritetet.
Materialet procedurale i janë referuar Prokurorisë së Durrësit për veprime të mëtejshme, për veprën penale “Vjedhja”.
