Giacomo Raspadori do jetë përforcimi më i ri i Atletico Madrid. Pas negociatave intensive në orët e fundit, Napoli dhe klubi spanjoll kanë arritur një marrëveshje të plotë për transferimin e sulmuesit italian, i cili do të veshë fanellën e Los Colchoneros për pesë sezonet e ardhshme.
Sipas medieve italiane, marrëveshja është mbyllur për një shifër totale prej 26 milionë eurosh, 22 milionë euro pagesë fikse dhe 4 milionë në formë bonusesh. Raspadori do të nënshkruajë një kontratë që e lidh me skuadrën e Diego Simeones deri në vitin 2030.
25-vjeçari vjen pas një sezoni pozitiv me Napolin, ku pavarësisht se nisi shumë ndeshje nga stoli, la gjurmë në fushë. Në 26 paraqitje në Serie A gjatë sezonit 2024-25, ai shënoi 6 gola dhe dhuroi 1 asist, duke kontribuar në mënyrë të rëndësishme në fitoren e titullit nga skuadra e trajnerit Antonio Conte.
Për Atletico Madrid, afrimi i Raspadorit sjell freski në repartin sulmues, teksa trajneri Simeone kërkon të shtojë alternativa cilësore për sezonin e ri në La Liga dhe Champions League.
