“Nuk jemi aspak në favor të iniciativës së qeverisë izraelite për të pushtuar Gazën”, deklaroi ministri i Jashtëm italian Antonio Tajani.
Pavarësisht diskutimeve për një deklaratë të përbashkët mes Francës, Britanisë, Gjermanisë dhe Italisë, dallimet në qëndrime penguan një tekst të unifikuar.
Netanyahu reagoi ashpër ndaj Berlinit, duke e quajtur vendimin “një shpërblim për Hamasin” pas një bisede telefonike të tensionuar me Merz. Sipas burimeve diplomatike, Gjermania mund të shkojë edhe më tej me masa të tjera, diçka që deri tani e kishte refuzuar, duke u kundërvënë ndaj çdo sanksioni apo presioni të përbashkët të BE-së ndaj Tel Avivit.
Sekretari i Përgjithshëm i OKB-së, António Guterres, paralajmëroi se pushtimi ushtarak i Gazës duhet “rreptësisht të shmanget”, ndërsa Këshilli i Sigurimit do të mblidhet të dielën. Kryeministri britanik Keir Starmer i bëri thirrje Netanyahu-t të “rishqyrtojë menjëherë” planin, ndërsa presidentja e Komisionit Europian, Ursula von der Leyen, e cilësoi atë të papranueshëm dhe me pasoja në marrëdhëniet me Europën.
Franca, Kanadaja, Belgjika, Spanja, Norvegjia dhe Kina kanë reaguar gjithashtu me kritika të forta, ndërsa Turqia u ka bërë thirrje vendeve të tjera të ndërmarrin veprime për të ndaluar planin.
Vendimi i Berlinit konsiderohet një kthesë historike, duke pasur parasysh mbështetjen dekadash të Gjermanisë për mbrojtjen e Izraelit, përfshirë furnizimin me nëndetëse, municione dhe sisteme të mbrojtjes ajrore. Merz tha se, për shkak të qëndrimit të palëkundur të Netanyahu-t dhe mungesës së një de-eskalimi, Gjermania “nuk do të autorizojë asnjë dërgesë armësh që mund të përdoret në Rripin e Gazës”.
Pavarësisht se furnizimet kishin rënë ndjeshëm pas kulmit të tetorit 2023, Berlini ka miratuar nga fundi i vitit 2023 deri në maj 2025 kontrata ushtarake për rreth 500 milionë euro në mbështetje të Izraelit.
