Shkëndija e Tetovës ka nisur mbrojtjen e titullit kampion në Maqedoninë e Veriut me një fitore bindëse 5-1 përballë Shkupit në ndeshjen e javës së parë të kampionatit.
Skuadra e drejtuar nga Jeton Beqiri, edhe pse me shumë zgjedhje të dyta në fushë për shkak të lënies pushim të titullarëve që aktivizohen në ndeshjet në Europë, ia ka dalë të fitojë në këtë sfidë me lehtësi.
Ramadani dhe Zejnullai shënuan në pjesën e parë, ndërsa në të dytën ishte një dygolësh i Ibraimit dhe një tjetër i shënuar nga Latifi që vulosën suksesin e pastër të tetovarëve, me kryeqytetasit të cilët shënuan golin e nderit me Hajvalin.
Kujtojmë që Shkëndija është kualifikuar në turin e tretë të Champions League teksa humbi përballjen e parë ndaj Qarabag.
Në rast eliminimi nga skuadra azere, kampionët e Maqedonisë do të luajnë në Play-Off-in e Europa League. Nëse nuk ia dalin edhe këtu minimalisht ekipi i Jeton Beqirit ka siguruar grupet e Ligës së Konferencës.
