Një i mitur ka mbetur i plagosur në kokë ditën e sotme, në plazhin e Gjirit të Gramës në gadishullin e Karaburunit.
Autoritetet policore raportojnë se bëhet fjalë për një 12 vjeçar, me shtetësi të huaj, i cili ishte hedhur në det nga një shkëmb i lartë dhe kishte mbetur i plagosur në kokë.
I shoqëruar nga prindërit, i mituri është transportuar me urgjencë, fillimisht me mjet lundrues dhe më pas me ambulancë, drejt spitalit për të marrë ndihmë mjekësore, teksa raportohet se ndodhet jashtë rrezikut për jetën.
Policia e Kufirit dhe Migracionit Vlorë u bën thirrje pushuesve që frekuentojnë plazhet e jugut, në zona të thella e të izoluara, si Gjiri i Gramës, të tregojnë kujdes të shtuar, pasi këto vende janë të aksesueshme kryesisht me mjete lundruese dhe nuk kanë mbulim me rrjet celular në të gjitha rastet.
