Presidenti amerikan Donald Trump ka njoftuar planet për një regjistrim të ri të popullsisë në SHBA, i cili sipas tij do të përjashtojë personat që ndodhen në vend në mënyrë të paligjshme. Ky është veprimi më i fundit i Trump në përpjekjen për të ndryshuar institucionet ekonomike më të rëndësishme të SHBA-së.
Në një postim në rrjetin social Truth Social të enjten në mëngjes, Trump tha se kishte urdhëruar Departamentin e Tregtisë “që të fillojë menjëherë punën për një regjistrim të ri dhe shumë të saktë, bazuar në të dhëna dhe fakte bashkëkohore dhe, më rëndësi, duke përdorur rezultatet dhe informacionet e zgjedhjeve presidenciale të vitit 2024”.
Trump shtoi: “Personat që ndodhen në vendin tonë në mënyrë të paligjshme nuk do të numërohen në regjistrim”.
Administrata Trump ka bërë përpjekje të mëdha për të dëbuar emigrantët pa dokumente, duke e bërë këtë një prej prioriteteve kryesore të politikave të saj, me një fushatë të ashpër ndaj personave që konsiderohen të jenë në SHBA në mënyrë të paligjshme.
Gjithashtu, Trump ka ndërhyrë në menaxhimin e institucioneve të rëndësishme ekonomike, duke shkarkuar javën e kaluar kreun e agjencisë së statistikave të punës dhe duke kritikuar kreun e Rezervës Federale.
Regjistrimi i popullsisë në SHBA, i kërkuar nga Kushtetuta dhe që kryhet çdo dekadë që nga viti 1790, konsiderohet si një nga raportet më të rëndësishme dhe me ndikim ekonomik të vendit.
Zyrtarët e Byrosë së Regjistrimit pranë Departamentit të Tregtisë përpiqen të numërojnë çdo banor të SHBA-së qytetarë dhe jo-qytetarë, duke shpërndarë anketa dhe duke angazhuar mijëra punonjës për mbledhjen e të dhënave në terren.
Regjistrimi përdoret për të përcaktuar numrin e vendeve që i takojnë çdo shteti në Dhomën e Përfaqësuesve, si dhe për shpërndarjen e fondeve federale, për politikat ekonomike dhe planifikimin e infrastrukturës. Regjistrimi i fundit, në vitin 2020, evidentoi një popullsi prej 331,449,281 banorësh dhe ishte i 24-ti në histori.
Ndërsa regjistrimi nuk përcakton saktësisht numrin e personave që ndodhen në vend në mënyrë të paligjshme, Qendra Peë për Hulumtime vlerësoi në vitin 2022 se 11 milionë persona në SHBA ishin pa dokumenta. Gjatë mandatit të tij të parë, Trump kërkoi që në regjistrim të shtohej një pyetje nëse përgjigjësit janë qytetarë amerikanë, por kjo u hoq pasi Gjykata e Lartë vendosi se arsyetimi i administratës për këtë pyetje nuk ishte bindës.
Një pyetje për shtetësinë kishte filluar të përfshihej në regjistrim në vitin 1820, por u hoq në vitin 1950 për shkak të shqetësimeve për ndikimin e saj në saktësinë e të dhënave.
Mbi 13 mijë persona punojnë përherë në Byronë e Regjistrimit, ndërsa për anketa përdoren qindra mijëra punonjës të përkohshëm. Deri tani, Byroja e Regjistrimit nuk është përgjigjur për një koment mbi këtë lajm.
