Skënderbeu mposhti Pogradecin në miqësore me rezultatin 2-0, në ndeshjen e zhvilluar në qytetin liqenor.
Korçarët ishin më kërkues nga fillimi, duke marrë në dorë kontrollin e lojës. Dominimi i ekipit të drejtuar nga Ernest Gjoka u shpërblye në minutën e 11-të, kur Janaqi pas një kombinimi të bukur, lëshoi një gjuajtje të fortë dhe e ndali topin në rrjetë.
Këtë avantazh Skënderbeu e ruajti gjatë gjithë pjesës së parë, kur iu afrua edhe golit të dytë. Fraksioni i dytë nuk kishte ndryshime të shumta në aspektin e lojës, me Pogradecin që provoi të rrezikonte, por dy tentativat në zonë, shkuan jashtë.
Në minutën e 70-të, skuadra bardhekuqe dyfishoi shifrat. Gjini provoi me një krosim në zonë dhe mbrojtësi Rodrigez, në tentativë për të ndaluar topin, e dërgoi atë në portën e tij, duke shkaktuar autogol.
Rezultati nuk ndryshoi deri në fund, me Skënderbeun që mori fitoren e dytë radhazi, e cila vjen pak ditë pas asaj ndaj Besës, 3-1.
