Më 8 gusht, Gjykata e Posaçme Kundër Korrupsionit dhe Krimit të Organizuar (GJKKO) do të shqyrtojë kërkesën e përfaqësuesve ligjorë të kreut të Partisë së Lirisë, Ilir Meta, për zëvendësimin e masës së sigurisë.
Kërkesa u paraqit nga avokatët e Metës ditën e mërkurë, duke argumentuar se pas përfundimit të hetimeve dhe komunikimit zyrtar të akuzave nga Prokuroria e Posaçme, “nuk ekzistojnë më arsye procedurale për mbajtjen në paraburgim të klientit të tyre”.
Meta ndodhet në burg që prej tetorit të vitit të kaluar, në kuadër të hetimeve për dosjen CEZ-DIA dhe lobimin në SHBA. SPAK e akuzon ish-presidentin për veprat penale: “Pastrim i produkteve të veprës penale ose veprimtarisë kriminale”, “Korrupsion pasiv i funksionarëve të lartë shtetërorë ose të zgjedhurve vendorë”, si dhe “Refuzim për deklarim, mosdeklarim, fshehje dhe deklarim të rremë të pasurive dhe interesave private”.
Nga ana tjetër, Meta ka mohuar vazhdimisht akuzat, duke i cilësuar ato si tërësisht politike dhe të pabazuara në prova.
