Al-Hilal ka arritur një marrëveshje me Liverpool për të transferuar sulmuesin uruguaian Darwin Nunez, sipas raportimeve të fundit në Angli.
Marrëveshja kap vlerën e 46 milionë paundëve plus bonuse. Raportime të tjera bëjnë me dije se Nunez do të firmosë një kontratë trevjeçare me një pagë vjetore prej 18.7 milionë paundësh.
Vendimi për largimin e Nunez, vjen pasi Liverpool ka siguruar shërbimet e sulmuesit francez Hugo Ekitike për 79 milionë paund dhe mbetet i interesuar për sulmuesin e Newcastle, Alexander Isak, për të cilin po përgatit një ofertë të re që mund të shkojë deri në 150 milionë paund.
Gazetari i njohur Fabrizio Romano raportoi se Nunez është gati të udhëtojë për vizitat mjekësore në çdo moment, duke konfirmuar se marrëveshja është në fazat përfundimtare.
Për pasojë, sulmuesi nuk pritet të jetë pjesë e skuadrës së Liverpool për përballjen ndaj Crystal Palace në Community Shield këtë fundjavë.
Nunez iu bashkua Liverpool-it në verën e vitit 2022 nga Benfica për 85 milionë paund dhe ka realizuar 40 gola në 143 paraqitje.
