Prokuroria e Posaçme (SPAK) ka përfunduar hetimet paraprake dhe ka dërguar për gjykim 5 persona, ku 4 prej tyre akuzohen për korrupsion zgjedhor në zgjedhjet lokale të vitit 2023.
Mes të pandehurve është edhe ish-kandidati i opozitës për kreun e Bashkisë së Rrogozhinës, Shëlqim Hoxha. Ndërkohë, 4 të pandehurit e tjerë janë shtetasit:
- Limon Shala
- Fatmir Thaçi
- Florant Saraçi
- Engjell Cara
SPAK thotë se në përfundim të hetimeve të kryera, ka rezultuar se shtetasit Engjell Cara, Limon Shala, Fatmir Thaçi dhe Florant Saraçi janë vënë nën akuzë për kryerjen e veprës penale,“Korrupsioni aktiv në zgjedhje”, e kryer në bashkëpunim dhe më shumë se një herë.
Ndërkohë, ish-kandidati i opozitës për kreun e Bashkisë së Rrogozhinës, Shëlqim Hoxha akuzohet për veprën penale“ Moskallëzim i krimit”.
Sipas organit të akuzës, Engjell Cara, Limon Shala, Fatmir Thaçi dhe Florant Saraçi ofronin bileta udhëtimi të parapaguara ndaj zgjedhësve në këmbim të votave për kandidatin Shkëlqim Hoxha në zgjedhjet bashkiake të vitit 2023.
“Hetimet treguan se këta shtetas, në bashkëpunim me njëri-tjetrin, kanë siguruar dhe ofruar bileta udhëtimi të parapaguara për persona të ndryshëm (të dokumentuara në 64 raste), me qëllim që të votonin në favor të kandidatit, Shkëlqim Hoxha, në zgjedhjet vendore të vitit 2023 në Bashkinë Rrogozhinë.
Gjithashtu, ka rezultuar se shtetasi Shkëlqim Hoxha ishte në dijeni të kësaj veprimtarie të paligjshme, më konkretisht se shtetasit Fatmir Thaçi dhe Limon Shala ishin të angazhuar në sigurimin dhe ofrimin e biletave të udhëtimit për persona të ndryshëm, me qëllim pjesëmarrjen në votime si dhe dhënien e votës në favor të tij, për shkak të cilësisë së tij si kandidat i Partisë Demokratike për Bashkinë Rrogozhinë Ai nuk e ka kallëzuar në organet kompetente, në kundërshtim me dispozitat ligjore në fuqi, konkretisht nenin 300 i Kodit Penal.
Procedimi penal nr. 161/2023 është bashkuar me procedimin penal nr. 162/2023, duke u hetuar si një çështje e vetme, për shkak të përputhjes së fakteve dhe subjekteve nën hetim.” – thuhet në njoftim.
SPAK thotë se regjistrimi i procedimeve është bërë mbi bazën e referimeve të përcjella nga strukturat hetimore pranë Drejtorisë së Policisë së Durrësit.
Kujtojmë se në zgjedhjet lokale të vitit 2023, zgjdhjet për kreun e Bashkisë së Rrogozhinës u fituan nga kandidati socialist Edison Memolla me 5129 vota, ndërsa kandidati i koalicioni “Bashkë Fitojmë” mori 5108 vota, ku diferenca mes tyre ishte vetëm 28 vota.
Kujtojmë se shpesh herë, kreu i opozitës Sali Berisha e akuzon SPAK-un se mbron korrupsionin zgjedhor të mazhorancës, pasi goditjes ndaj kësaj të fundit për “blerje votash” janë me “pikatore” edhe pse akuzat dhe denoncimet kanë qenë të shumta.
