Akti i ri i të Dhënave i Bashkimit Europian do të hyjë në fuqi më 12 shtator, vetëm tre muaj para se Komisioni Europian të paraqesë paketën për thjeshtimin digjital – një nismë për të shkurtuar barrën burokratike dhe për të lehtësuar detyrimet e raportimit për kompanitë teknologjike.
Por sipas përfaqësuesve të industrisë, koha e prezantimit të këtyre dy nismave po krijon konfuzion mes kompanive të teknologjisë që do të preken drejtpërdrejt nga rregullat e reja.
I propozuar në vitin 2022, Akti synon të sigurojë ndarjen e drejtë të të dhënave të krijuara nga pajisjet inteligjente, si makinat e lidhura apo pajisjet smart për shtëpi. Sipas ligjit, prodhuesit duhet të sigurojnë që përdoruesit të kenë qasje dhe mundësi për të ndarë të dhënat e tyre. Megjithatë, ka përjashtime në rastet kur ndarja e të dhënave mund të zbulojë sekrete të rëndësishme tregtare.
Në raste emergjente si përmbytje apo sulme kibernetike, kompanitë private mund të detyrohen të ndajnë të dhëna me autoritetet publike për menaxhimin e krizës.
Megjithatë, grupet tregtare si Business Software Alliance (BSA) dhe Computer & Communications Industry Association (CCIA) shprehin shqetësime për pasigurinë që sjell paketa e re e thjeshtimit, e cila mund të ndryshojë rregullat sapo ato të kenë hyrë në fuqi. “Rreziku është që kompanitë të zbatojnë plotësisht Aktin e të Dhënave, për t’u përballur më pas me rishikime të mundshme,” thuhet në deklaratën e BSA-s, ku përfshihen kompani si Amazon, Microsoft, Cisco dhe Oracle.
Sipas BDA, më pak se gjysma e vendeve anëtare të BE-së kanë caktuar autoritetet kombëtare për zbatimin e ligjit, duke rritur thirrjet për shtyrje të hyrjes në fuqi deri sa të sigurohet një zbatim i qartë dhe i efektshëm.
Zyrtarë të CCIA paralajmëruan se rihapja e Aktit në këtë fazë do të sjellë më shumë paqartësi për bizneset, duke e bërë më të vështirë përshtatjen me rregullat e reja.
Komisioni Europian, nga ana tjetër, theksoi se nuk ka lidhje mes paketës së thjeshtimit dhe masave kombëtare të nevojshme për zbatimin e Aktit. “Komisioni po punon ngushtë me shtetet anëtare për një zbatim në kohë dhe të njëtrajtshëm,” tha një zëdhënës.
Përveç pasigurive, kompanitë kërkojnë udhëzime të qarta mbi çështje të ndërlikuara si mbrojtja e sekreteve tregtare dhe ndërveprimi me rregulloren e privatësisë së të dhënave (GDPR).
Sipas BSA, mbeten shqetësime të rëndësishme, përfshirë edhe atë nëse kompanitë mund të rikuperojnë vlerën e plotë të kontratave kur klientët i ndërpresin para kohe. Po ashtu, kërkesa për ndërveprueshmëri mes ofruesve të shërbimeve cloud mund të dëmtojë konkurrencën dhe të rrisë kostot për përdoruesit.
Sipas rregullave, shkeljet e Aktit mund të ndëshkohen me gjoba deri në 20 milionë euro ose 4% të xhiros vjetore globale të kompanisë – në varësi të shumës më të lartë.
