Shqipëria U-20 e vajzave ka zhvilluar në fundjavë dy ndeshje të vlefshme për Divizionin B të Kampionatit Europian, kompeticion që po mbahet në Miskolc të Hungarisë.
Vajzat kuqezi kanë koleksionuar dy humbje në sfidat e tyre në Grupin A. Skuadra e drejtuar nga trajneri Vladimir Xheka debutoi të shtunën kundër Danimarkës, duke u mposhtur në shifrat 45- 78 (13-26, 8-19, 7-21, 17-12).
Edhe më e thellë ishte disfata e të dielës në takimin kundër Serbisë, me vajzat kuqezi që u mundën me rezultatin e rëndë 22-116 (8-24, 2-32, 2-29, 10- 31).
Shifra që nuk kanë nevojë për shumë koment, të cilat tregojnë qartë nivelin e sportit të basketbollit në vend, ndërsa Divizioni B duket një mision i pamundur për Shqipërinë.
Vajzat kuqezi do të rikthehen sot në parket për ndeshjen e tretë në grup, teksa do të përballen me Bullgarinë në orën 20:00.
