Klubi i Partizanit vazhdon përgatitjet për sezonin e ri, për të cilin problemi më i madh i të kuqve është se nuk kanë ende një trajner, ndonëse mbeten pak më shumë se 3 javë nga ndeshja e parë në kampionat.
Ndërsa në klub shqyrtojnë emra të ndryshëm, ekipi vazhdon të drejtohet në stërvitje nga trajneri i U19, Fation Muhameti, siç ka konfirmuar edhe vetë klubi me një postim në rrjetet sociale.
“Skuadra vijon përgatitjet në kuadër të startit të edicionit të ri futbollistik. Në orën 19:00, grupi i lojtarëve zhvilloi sot seancën e radhës stërvitore në stadiumin “Arena e Demave”.
Drejtimin e përkohshëm të ekipit e ka marrë Fation Muhameti, aktualisht trajner i ekipit tonë U-19, i cili po zhvillon seancat stërvitore me skuadrën gjatë këtyre ditëve. Të shtunën ekipi luan testin miqësor ndaj Kukësit në stadiumin “Arena e Demave””, shkruhet në njoftimin e Partizanit.
Muhameti do të jetë ai që do të drejtojë ekipin në këtë miqësore, ndërsa është e paqartë nëse ai do të vazhdojë të jetë pjesë e stafit të ekipit të parë edhe nën drejtimin e trajnerit të ri, meqë është ai që tashmë ka informacione më të plota për lojtarët që po drejton në stërvitje.
