Nga Boldnews.al
Në vitin 2022, kompania koncesionare “Delvina Gas” përfundoi një investim me vlerë totale 3.75 milionë dollarë për impiantin e pastrimit të gazit në vendburimin e Delvinës, në jug të Shqipërisë.
Ky impiant është pjesë kontratës koncesionare të nënshkruar ndërmjet qeverisë shqiptare dhe shoqërisë private në vitin 2007 dhe shërben për të pastruar lëndën hidrokarbure nga sulfidet e hidrogjenit, një lëndë pa ngjyrë, me erën e keqe të vezës së prishur dhe shumë toksik.
Dokumentat e siguruar nga “Boldnews.al” dëshmojnë se përfundimi i punimeve për këtë impiant është konfirmuar nga kompania shtetërore e naftës, “Albpetrol”, si pronarja e vendburimit të Delvinës, ndërkohë që shoqëria koncesionare “Delvina Gas Company” caktoi dy inxhinjerë të saj për mbikqyrjen e funksionit të kësaj vepre.
Pra, prej vitit 2022, gjithçka ishte në rutinën normale, ku kompania koncesionare vijonte rregullisht aktivitetin e saj, nën mbikqyrjen periodike të pronarit “Albpetrol”, të Ministrisë së Infrastrukturës dhe Agjencisë Kombëtare të Burimeve Natyrore (AKBN).
Show i dështuar i policisë
Por, tre vjet pas përfundimit të impiantit të pastrimit të gazit dhe funksionimit normal të tij, e konkretisht në 29 Korrik 2025, disa punonjës të Policisë së Delvinës paraqiten në ambjentet e shoqërisë koncesionare.
Pa ekspertizën e duhur, të pashoqëruar me profesionistë të fushës, punonjësit e Policisë ‘zbulojnë” se shoqëria “Delvina Gas Company” po kryente punime pa leje për ndërtimin e një Termocentralit (TEC).
Punonjësit e policisë kontaktojnë me inxhinjerët e shoqërisë koncesionare, Luan Metaj dhe Elton Malkaj, të cilët mbanin pozicionin e mbikqyrësit të impiantit të pastrimit të gazit.
Dy inxhinjerët u munduan t’u shpjegonin oficerëve të Policisë se aty gjithçka ishte në rregull, se ajo që e konsideronin si “TEC”, në fakt ishte impiant pastrimit të gazit dhe se nuk ka asnjë punim pa leje, pasi ai ishte ndërtuar tre vjet më parë dhe ishte çertifikuar nga “Albpetrol”.
Por, argumentat e inxhinjerëve nuk u morën parasysh nga punonjësit e Policisë së Delvinës, të cilët, nën drejtimin e oficerëve të Anti-Krimit Ekonomik në Drejtorinë e Policisë së Vlorës, vendosën arrestimin e tyre, nën dyshimet për “ndërtim pa leje”.
Ndërkohë që dy inxhinjerët ende nuk kishin mbërritur në ambjentet e Komisariatit, Policia u kujdes që të shpërndante menjëherë informacionin për këtë “goditje të rëndësishme të paligjshmërisë në fushën e hidrokarbureve”.
U njoftua arrestimi i dy inxhinjerëve dhe shpallja në kërkim e biznesmenit Sokol Meqemeja, i cili mund të jetë një prej përfituesve fundorë të shoqërisë “Delvina Gas Company” Ltd, kompania mëmë e degës së shoqërisë së huaj në Shqipëri, “Delvina Gas Company”.
Në pamjet e shpërndara nga Policia e Shtetit nga “vendngjarja”, pra nga ambjentet e “Delvina Gas”, lexohet qartësisht një tabelë, ku thuhet “Impianti i pastrimit të gazit”. Megjithatë, pas një përkthimi shqip-shqip, Policia e ka konsideruar si “TEC”, i cili është një grup pajisjesh teknike me funksion tërësisht të ndryshme nga impianti i pastrimit.
Veprimet policore u sfumuan brenda pak orëve, kur prokurorja e gatshme në Sarandë, Esmeralda Basho, urdhëroi lirimin e menjëhershëm të të dy inxhinjerëve, pasi nuk rezultonte asnjë lloj paligjshmërie në veprimtarinë e tyre.
Impianti i ligjshëm
Ndërtimi i impiantit të pastrimit të gazit në vendburimin e Delvinës (pra, nuk është TEC, siç pretendoi Policia e Vlorës), ka qenë pjesë e Planit të Punës së shoqërisë koncesionare “Delvina Gas Company” për vitin 2022, i miratuar nga pronari shtetëror “Albpetrol” sha.
Me Vendimin nr.6, datë 2 Shkurt 2022, Komiteti Këshillimor miratoi Planin e Punës dhe Buxhetin e vitit 2022 për Vendburimin e Gazit në Delvinë, Sarandë.
Komiteti Këshillimor përbëhej nga përfaques të “Albpetrolit”, ndër të cilët edhe Drejtori Ekzekutiv i kohës, Florian Muçaj, si edhe përfaqësues të kompanisë koncesionare “Delvina Gas Company”.
Në projektin e punës për vitin 2022 parashikohej, ndër të tjera “projektimi, prokurimi dhe instalimi i impiantit të pastrimit e gazit nga H2S (sulfidet e hidrogjenit) dhe përgatitjen e tij për shitje”.
Ndërtimi i këtij impianti ishte pjesë e “kompletimit dhe modernizimit të infrastrukturës sipërfaqësore për menaxhimin e prodhimit (të gazit)”, siç ishte parashikuar në kontratën koncesionare të vitit 2007 mes qeverisë shqiptare dhe “Delvina Gas Company”.
Sipas Buxhetit të miratuar nga Komiteti Këshillimor, kostot e kompanisë koncesionare për ndërtimin e impiantit të pastrimit të gazit ishin 3 milionë dollarë, ndërkohë që kostot totale operative, pra ku përfshiheshin edhe aktivitetet e nevojshme teknike për ngritjen e tij, arrin në 3.75 milionë dollarë.
Më tej, dokumenti i përbashkët “Albpetrol-Delvina Gas Company” paraqet edhe detaje të shumta teknike për mënyrën se si do të pastrohet gazi i dalë nga vendburimi i Delvinës, si edhe cilësia që do të jetë e gatshme për tregtim.
Impianti i pastrimit të gazit u përfundua nga “Delvina Gas Company” në vitin 2022 dhe, që prej asaj kohe, ai është në funksionim normal, sipas parashikimeve kontraktuale.
