Një studim i publikuar në revistën Advances in Nutrition ka zbuluar se mënyra se si e konsumojmë sheqerin ka rëndësi të madhe, dhe pirja e tij përmes pijeve është më e dëmshme sesa marrja e tij nga ushqimet.
Studiuesit analizuan të dhënat e më shumë se gjysmë milioni njerëzve në mbarë botën nga 29 studime të ndryshme, duke krahasuar zakonet e tyre të konsumimit të sheqerit me shëndetin e tyre.
Rezultatet ishin tronditëse. Për çdo 350 ml pije me sheqer të shtuar të konsumuar në ditë (si p.sh. cola ose lëngjet e paketuara), rreziku për diabet të tipit 2 rritej me 25 për qind.
Për çdo 240 ml lëng frutash, rreziku rritej me 5 për qind. Ndërkohë, tek ata që e konsumonin sheqerin përmes ushqimeve (si ëmbëlsirat), nuk u vu re i njëjti rrezik i lartë për diabet.
Pse është sheqeri i dëmshëm për trupin?
Sipas dietologes Dena Champion nga Ohio State University, problemi më i madh është sasia e tepërt.
“Sheqeri i tepërt çon në shtim peshe dhe lë më pak hapësirë për ushqime të shëndetshme”, ka theksuar ajo.
Tara Gidus Collingwood, konsulente për ushqim, shton se sheqeri i tepërt rrit edhe rrezikun për sëmundje të zemrës, probleme dentare, dhe sëmundjen e mëlçisë jo-alkoolike. Megjithatë, sasia e vogël e sheqerit nuk është problematike.
“Përdorimi i rastësishëm i sheqerit në sasi të vogla nuk përbën rrezik për një person mesatarisht të shëndetshëm. Por sasitë e mëdha të sheqerit të shtuar dhe të rafinuar mund të shkaktojnë probleme me kalimin e kohës”, ka thënë Lisa Moskovitz, themeluese e NY Nutrition Group.
Ajo ka shtuar se përveç diabetit dhe sëmundjeve të zemrës, sheqeri i tepërt shkakton edhe inflamacion në trup, që lidhet me sëmundje si kanceri, sëmundjet autoimune dhe ato kardiovaskulare.
Pse pijet janë më të dëmshme se ushqimet me sheqer?
Sipas dietologes Jessica Cording, arsyeja kryesore është se pijet me sheqer nuk përmbajnë proteina, yndyra apo fibra, që janë përbërës që ndihmojnë në ngadalësimin e përthithjes së sheqerit.
“Kur e pi sheqerin, për shembull në një pije të gazuar apo lëng frutash, trupi e thith shumë shpejt dhe vjen një rritje e menjëhershme e nivelit të sheqerit në gjak, e ndjekur nga rënia po aq e shpejtë”, ka thënë ajo.
Collingwood ka theksuar se përmes pijeve, është shumë e lehtë të konsumosh sasi të mëdha sheqeri në pak kohë.
“Një pije 600 ml mund të përmbajë 15 deri në 18 lugë çaji sheqer, shumë më shumë se një racion i zakonshëm ëmbëlsire”, ka thënë ajo.
Cilat janë pijet që duhen shmangur?
Studimi veçon pije si: pijet e gazuara me sheqer, lëngjet e paketuara të frutave, limonadat, etj.
Champion sugjeron të konsumohen me kujdes ose të shmangen sa më shumë.
“Është më mirë të hash frutin e plotë sesa të pish lëngun e tij”, ka thënë ajo.
Për ata që kërkojnë diçka me flluska, ajo rekomandon ujin me gaz të kombinuar me fruta ose barishte.
“Frutat e malit me gjethe menteje janë kombinim i këndshëm”, ka thënë ajo.
Në fund, Moskovitz ka thënë se edhe nëse dëshiron ndonjëherë të konsumoni ndonjë pije të ëmbël, është në rregull, por kjo duhet të bëhet sa më rrallë.
“Thjesht mos e bëni zakon të përditshëm”, ka thënë ajo.
