Të paktën dy anije cisternë të ngarkuara me naftë ruse, që ishin nisur drejt rafinerive në Indi, janë devijuar drejt destinacioneve të tjera pas vendosjes së sanksioneve të reja nga Shtetet e Bashkuara, raporton Reuters.
Departamenti i Thesarit të SHBA-së vendosi këtë javë sanksione ndaj më shumë se 115 individëve, kompanive dhe anijeve të lidhura me Iranin, disa prej të cilave kanë marrë pjesë në transportin e naftës ruse, sipas agjencisë Reuters.
Presidenti amerikan Donald Trump, ka bërë thirrje për ndalimin e blerjeve të naftës nga Moska dhe ka kërcënuar me tarifa doganore deri në 100% nëse Rusia nuk arrin një marrëveshje paqeje me Ukrainën.
Sipas të dhënave të publikuara nga portet ruse dhe burime tregtare, tre anije – Tagor, Guanyin (të dyja të tipit Aframax) dhe Tassos (tipi Suezmax) – kishin planifikuar të dorëzonin naftë ruse në portet indiane këtë muaj. Të gjitha ndodhen tashmë nën sanksione të SHBA-së.
Anija Tagor ishte nisur drejt portit Chennai në bregun lindor të Indisë, ndërsa Guanyin dhe Tassos kishin destinacione në perëndim të vendit. Tashmë, Tagor është kthyer drejt Dalian, Kinë, ndërsa Tassos po lëviz drejt Port Said, Egjipt.
Ndërkohë, Guanyin vazhdon të ndjekë itinerarin fillestar drejt Sikka, një port që përdoret nga Reliance Industries dhe Bharat Petroleum.
Në një zhvillim të ndarë, dy anije të tjera – Achilles dhe Elyte – janë gati të shkarkojnë naftë ruse të tipit Urals për llogari të Reliance, sipas të dhënave të kompanisë analizuese LSEG. Të dyja këto anije ndodhen nën sanksione nga Mbretëria e Bashkuar dhe Bashkimi Evropian, ndërkohë që India ka dënuar sanksionet e vendosura nga BE.
Sanksionet perëndimore të ashpërsuara ndaj Rusisë, të cilat synojnë reduktimin e të ardhurave të saj nga eksporti i naftës – të ardhura që besohet se financojnë luftën në Ukrainë – po ndikojnë gjithnjë e më shumë në eksportet ruse drejt Indisë, një prej klientëve kryesorë të Moskës për naftë.
