Qeveria franceze deklaroi se po ndjek me vëmendje një plan amerikan për të asgjësuar miliona dollarë kontraceptivë të magazinuar në Europë, pas protestave nga grupet feministe franceze, organizata të të drejtave të njeriut dhe institucione për planifikimin familjar, të cilat e cilësuan këtë veprim si sulm të dëmshëm ndaj të drejtave të grave.
The Guardian raportoi më herët gjatë këtij muaji se administrata e Donald Trump planifikon të asgjësojë kontraceptivë me vlerë 9.7 milionë dollarë, që besohet se ndodhen në një magazinë në Belgjikë dhe mund të transferohen në Francë për djegie. Produktet janë kryesisht kontraceptivë afatgjatë, të blera përmes programeve shëndetësore publike të USAID dhe të destinuara për gratë në Afrikë.
Një zëdhënës i Departamentit të Shtetit të SHBA-së i tha AFP se është marrë një “vendim paraprak për të asgjësuar” disa produkte kontraceptive nga kontratat e USAID të epokës së Biden, që tashmë janë ndërprerë.
Administrata e Trump e shpërbëri USAID-in në janar.
Zëdhënësi shtoi se procesi i shkatërrimit do të kushtojë 167,000 dollarë dhe “nuk po asgjësohen ilaçe për HIV apo prezervativë”.
Kontraceptivët janë të magazinuar në qytetin Geel në Belgjikë dhe ka raportime se do të digjen në Francë, por autoritetet franceze nuk e kanë konfirmuar këtë. Si Franca ashtu edhe Belgjika janë nën presion për të ndaluar shkatërrimin.
“Po e ndjekim këtë situatë me kujdes dhe mbështesim vullnetin e autoriteteve belge për të gjetur një zgjidhje që shmang shkatërrimin e kontraceptivëve. Mbrojtja e shëndetit seksual dhe të drejtave riprodhuese është prioritet në politikën e jashtme të Francës”, deklaroi Ministria franceze e Shëndetësisë.
Një koalicion i organizatave feministe, sindikatave dhe grupeve të të drejtave këtë javë nisi një peticion për të ndaluar asgjësimin.
“Nuk do të lejojmë që ky vendim i padrejtë dhe seksist të zbatohet – është një humbje si ekonomike ashtu edhe njerëzore,” thuhet në deklaratë.
Udhëheqësja e të Gjelbërve, Marine Tondelier, i kërkoi presidentit Emmanuel Macron të ndërhyjë: “Franca nuk mund të bëhet bashkëpunëtore, qoftë edhe në mënyrë indirekte, me politika regresive.”
Deputetja socialiste Céline Thiébault-Martinez tha se nëse Franca nuk flet për këtë, do të humbasë besueshmërinë tek gratë. Ndërsa Sarah Durocher, drejtuese e një organizate për planifikimin familjar u shpreh se Franca ka përgjegjësi morale për të vepruar.
Charles Dallara, nipi i politikanit Lucien Neuwirth i cili mbështeti ligjin francez për kontraceptivët oral në vitin 1967, shkroi një letër të hapur ku i kërkoi Macron-it të mos e lejojë Francën “të bëhet pjesë e këtij skandali”.
Qeveria belge konfirmoi se është në kontakt urgjent me SHBA-të, por ende nuk dihet nëse produktet janë transferuar në Francë. Zëdhënësi i Ministrisë së Punëve të Jashtme tha se është kontaktuar ambasada amerikane në Bruksel dhe po eksplorohen të gjitha rrugët për të ndaluar shkatërrimin, përfshirë zhvendosjen e përkohshme të kontraceptivëve.
Organizata ndërkombëtare MSI Reproductive Choices ofroi të blejë, ripaketojë dhe menaxhojë logjistikën e produkteve me shpenzimet e veta, por oferta u refuzua. Edhe Federata Ndërkombëtare e Planifikimit Familjar (IPPF) bëri një ofertë pa kosto për qeverinë amerikane, por sipas AFP, edhe ajo u refuzua.
