Identifikohet trupi i pajetë, i cili u gjet ditën e djeshme rreth orës 16:00, në ujërat e liqenit të Fierzës, pranë këmbëve të urës së Drinit të Zi në Kukës, që lidh Kosovën me Shqipërinë.
Viktima është shtetasi Luan Nuredinaj (55 vjeç), nga fshati Oreshkë i Kukësit, për të cilin familjarët e tij në Tiranë kishin denoncuar humbjen në Komisariatin e Kamzës prej datës 27 korrik (e diel).
Burime zyrtare bëjnë me dije se ai vuante nga probleme të shëndetit mendor. Nga këqyrja paraprake e trupit dhe ekspertiza e mjekut ligjor nuk janë konstatuar shenja dhune.
“Në vijim të informacionit të dhënë dje, për gjetjen e trupit të pajetë të një shtetasi të paidentifikuar, në ujërat e lumit Drini i Zi, bëjme me dije se: Nga verifikimet rezultoi se trupi i pajetë i përket shtetasit L. N., 55 vjeç, banues në fshatin Oreshkë, i cili vuante nga probleme të shëndetit mendor. Familjarët e 55-vjeçarit kanë kallëzuar më datë 27.07.2025, në Komisariatin e Policisë Nr. 5, Tiranë, për largimin e tij nga banesa dhe humbjen e kontakteve me të”, njofton policia.
