Paraditen e së martës policia e shtetit zhvilloi një aksion dhe u hodhi prangat drejtorit dhe inxhinierit të kompanisë Delvina Gas, ndërsa shpalli në kërkim dhe pronarin e këtij koncesioni, Sokol Meqemenë.
Në mbrëmje prokuroria e Gjirokstrës ka urdhëruar lirimin e menjëhershëm të drejtorit dhe inxhinierit të arrestuar, pasi prokurorët vlerësuan se impianti i gazit i sekuestruar nuk shërbente për prodhim energjie por ishte një impant për pastrimin e gazit në vendburimin e puseve.
E megjithatë aksioni i policisë, i cili zhvillohet pak ditë pas arrestimeve në Bankers Petroleum orienton se qeveria mund të ketë një plan për të rikonfiguruar me metoda represive tregun e hidrokarbureve në Shqipëri.
Burime të rezervuara bëjnë të ditur se biznesmeni Meqemeja ishte prej disa kohësh në presion nga një grup ukrainas për ta shitur koncesionin. Grupi ukrainas dyshohet se është i lidhur me një mik izraelit të kryeministrit Rama i quajtur Ron Yeffet.
Ky i fundit, duket se ndihet i plotfuqishëm në Tiranë kohët e fundit, aq sa ka filluar të tregojë edhe muskujt ndaj biznesmenëve ose palëve që nuk ndajnë të njëjtin vizion biznesi me të.
Yeffet njihet si një kundërshtar i betuar i kryeministrit të izraelit Benjamin Netanyahu dhe mund të jetë në rrezen e vëmendjes së autoriteteve në Tel Aviv, çka mund të ketë sjellë si pasojë aksidentale dhe ekspozimin e kryeministrit Edi Rama në ndonjë rast delikat. /Hashtag.al
