Një shtetas shqiptar 25-vjeçar është arrestuar nga karabinierët e qytetit Terni në Itali, nën akuzën për trafik të lëndëve narkotike.
I riu, i cili ndodhej në Itali me vizë turistike të vlefshme në përputhje me rregullat e zonës Schengen, ishte duke qëndruar në vend si “turist”, por u zbulua se ishte i përfshirë në shpërndarjen e kokainës.
Sipas autoriteteve italiane, 25-vjeçari nuk kishte precedentë penalë më parë. Arrestimi i tij ndodhi gjatë një patrullimi rutinë pranë qendrës tregtare “Cospea”, ku oficerët vunë re një automjet të vogël me sjellje të dyshimtë. Sapo pa policinë, shqiptari u përpoq të largohej me vrap, duke braktisur mjetin dhe duke kaluar mes kalimtarëve.
Gjatë ndalimit, ai u shfaq jashtëzakonisht nervoz, gjë që çoi në kontrollin fizik dhe të automjetit me qira. Brenda mjetit, karabinierët zbuluan 62 doza kokaine të gatshme për shitje dhe 3000 euro në para të gatshme, të cilat dyshohen se janë përfituar nga aktiviteti i paligjshëm. Gjithashtu, gjatë kontrollit trupor iu gjetën edhe 43 gramë kokainë shtesë.
Mediat italiane raportojnë se autoritetet po hetojnë nëse i riu është pjesë e një rrjeti më të madh trafikimi droge. Pas arrestimit, ndaj tij u zhvillua një proces me procedurë të përshpejtuar në Gjykatën e Ternit. Gjykata konfirmoi ligjshmërinë e arrestimit dhe vendosi masën e ndalimit të banimit në provincë, ndërsa hetimet dhe procesi gjyqësor do të vijojnë në ditët në vijim.
