52-vjeçarja Kozeta Teço u gjet pa shenja jete në banesën e saj mëngjesin e sotëm në një kohë kur shtëpia ishte përfshirë nga flakët.
Fillimisht u dyshua se kishte humbur jetën nga asfikësia, por më pas u zbuluan shenjat e thikës në qafë, të cilat zbuluan se bëhet fjalë për vrasje.
Kozeta Teço është vrarë nga i dashuri i saj, Ilirjan Selmani. Ky i fundit më pas, i vuri flakëne banesës për të zhdukur gjurmët e tij por nuk ia doli dot.
Si u zbardh vrasja
Ilirjan Selmani, i cili dyshohet se kishte lidhje intime me Kozeta Teçon, fillimisht e ka vrarë 52-vjeçaren, më pas ka fshirë gjakun duke pastruar vendin e krimit dhe në fund i ka vënë zjarrin ambienteve të shtëpisë.
I riu ka ndezur disa vatra zjarri në banesë për të humbur gjurmët, por u kap nga kamerat e sigurisë duke hedhur diçka në koshin e mbeturinave aty pranë. Brenda koshave nuk kishte gjë tjetër veç peshqirëve dhe kartopecetave me gjakun e viktimës. Ato ishin përdorur Ilirjan Selmani për të zhdukur provat dhe për të pastruar vendin e ngjarjes.
Autori është shoqëruar në polici dhe po merret në pyetje për të zbardhur motivin që shtyu të vriste partneren e tij.
Në momentin kur po shqoërohej nga policia, i riu shfaqet i buzëqeshur para kamerave dhe iu drejtuar gazetarëve me fjalët “Nuk jam unë vrasë, jo”.
Autori i dyshuar i ngjarjes, pas daljes nga banesa, ka mohuar ta ketë kryer ai krimin.
37-vjeçari me probleme mendore
Për autorin dihet se ai punonte herë pas here në ndërtim apo në Greqi, rezulton gjithashtu të ketë qenë përdorues i lëndëve narkotike.
Po ashtu, është zbuluar se 37-vjeçari vuante nga probleme të shëndetit mendor dhe përfitonte pagesë invaliditeti për shkak të gjendjes së tij.
Autori i merrte para 52-vjeçares
Teço, në biseda me persona të afërt, kishte pohuar se Selmani i kishte marrë rreth 20 milionë lekë në total gjatë viteve të lidhjes.
Paratë, sipas saj, i vinin nga motrat që jetonin në Greqi dhe Tiranë. Madje kjo e fundit e kishte vizituar disa orë para se e motra të vritej dhe ishte kthyer për në Tiranë.
Se çfarë kanë diskutuar me njëra-tjetrën, ende nuk dihet.
Çfarë u tha autori miqve pas vrasjes
Pas vrasjes, Selmani është takuar me disa të njohur të tij, të cilëve u ka pohuar se kishte vendosur të ndahej nga Kozeta me pretendimin se ajo kishte krijuar një lidhje tjetër.
Por e gjitha ishte një alibi që nuk e shpëtoi dot nga prangat.
Policia vijon hetimet për zbardhjen e plotë të rrethanave dhe motiveve që qëndrojnë pas kësaj ngjarjeje të rëndë.
Kushëriri i viktimës: Jetonte e vetme!
Sotiraq Teço, kushëriri i viktimës, ka dhënë detajet për të cilat ai është në dijeni, rreth vrasjes së 52-vjeçares në Pogradec.
“Nuk di gjë, nuk ndërhyj dot në gjëra që nuk më lejohet. Kozeta jetonte e vetme kohët e fundit. Unë kam 20 vite që kam ikur, tre ditë kam që u ktheva nga Anglia. Isha në Niçë, zbrita nga atje, u lajmëruam dhe po vijnë e familjarë të tjerë. Nuk e dija që bëhej fjalë për Kozetën, e dija sikur bëhej fjalë për motrën e madhe se ajo njëherë e ndarë. Për këtë nuk di gjë. Sa i përket kësaj ngjarje, e di shteti. Unë jam me shtetin, të japë drejtësi”, tha ai për mikrofonin e Top Channel.
“Ishte shumë njeri i mirë. Jetonte vetëm. Unë kam dalë nga banesa në orën 4:30, kam ikur në Maqedoni. Nuk pashë gjë kur ika. Tani e mora vesh. Dje ishte e motra këtu, por ajo banon në Tiranë”, është shprehur kushëriri i viktimës.
