Dy të rinj, një shqiptar 24-vjeç dhe kushëriri i tij italian 23-vjeç, janë arrestuar nga karabinierët në Coriano, pasi në bagazhin e një makine që po riparonin në një servis pa leje, u gjetën tre pako me kokainë.
Makina ishte e parkuar prej më shumë se një muaji në një ambient që dyshohet se përdorej ilegalisht si ofiçinë mekanike. Kontrolli nisi si pjesë e një operacioni rutinë për një depo të dyshimtë, por gjatë verifikimeve, efektivët zbuluan 300 gramë kokainë të fshehura në automjetin që i përkiste motrës së shqiptarit.
Të arrestuarit mohuan autorësinë dhe pohuan se nuk kishin dijeni për drogën. Në seancën gjyqësore të zhvilluar me procedurë të përshpejtuar në Gjykatën e Riminit, gjyqtari vlerësoi të ligjshëm arrestimin, por vendosi një masë më të butë: detyrim paraqitje pesë herë në javë pranë stacionit të Karabinierëve në Coriano.
Gjatë kontrollit në banesën e shqiptarit u gjetën edhe 3.5 gramë marijuanë, e cila u dorëzua vullnetarisht dhe u cilësua për përdorim personal, pa pasoja të mëtejshme ligjore.
