Prokuroria e Posaçme ka nisur një hetim ndaj kompanisë AGI KONS me administrator Gentian Sulën ku hetuesit i kanë kërkuar informacione bashkisë Tiranë mbi lejet e ndërtimit, kontrata prokurimi dhe koncesionesh që “AGI Kons” ka lidhur me bashkinë e kryeqytetit nga viti 2015 e deri në vitin 2024.
Një tjetër kërkesë e Prokurorisë së Posaçme është ajo drejtuar Autoritetit Shtetëror për informacionin gjeo-hapësinor, ku në shkresë janë kërkuar “ortofotot” (pamjet nga lart satelitore) duke filluar që nga viti 2010 për dy vendndodhje, “Kodra e Diellit” dhe Resorti “Marea” në Qerret të Durrësit.
Biznesmenit Gentian Sula një ditë më parë iu komunikua akuza zyrtare nga SPAK atë të korrupsionit aktiv pasi rezulton i përfshirë tek dosja “Veliaj”.
Lidhja e tij me kryetarin e bashkisë të Tiranës, sipas SPAK, fillon që në momentin kur kryebashkiaku mbulonte detyrën e Ministrit të Punës dhe Çështjeve Sociale.
Koha kur Veliaj blen një banesë në bllokun rezidencial “Kodra e Diellit” në Tiranë që është në pronësi të Gentian Sulës.
Pas këtij momenti, Veliaj, asokohe në detyrën e Ministrit të Punës, emëron si zv/ministre bashkëshorten e biznesmenit Gentjan Sula.
Sipas SPAK, Veliaj posedon 3 vila në fshatin rezidencial Qerret në Kavajë të ndërtuara nga shoqëria “Agi Kons” në pronësi të biznesmenit Gentian Sula.
Një nga vilat posedohet nga vëllai i tij, një vilë e ka vetë Veliaj dhe një të tretë e ka shembur për të krijuar hapësira shtesë për një fushëpamje më të gjerë të horizontit nga dritaret e vilave luksoze./ Ora News
