Sipas FCInter1908, Asllani nuk ka të ardhme në ‘San Siro’, dhe ziklatrit janë të vendosur ta shesin për të përfituar financiarisht nga largimi i tij.
23-vjeçari refuzoi transferimin në Andaluzi, te Betisi, më herët gjatë verës, edhe pse Interi kishte pranuar ofertën e klubit spanjoll. Arsyeja kryesore që Asllani përmendi ishte për çështje familjare.
Lojtari preferon të qëndrojë në Serie A dhe nuk është i interesuar të pranojë oferta nga jashtë Italisë. Ky pozicionim i tij e vështirëson Interin në gjetjen e një klubi që mund të plotësojë çmimin e kërkuar prej 18 milionë eurosh.
Vetëm disa klube italiane kanë kapacitet financiar për një shifër të tillë, por asnjë prej tyre nuk ka shfaqur interes konkret për Asllanin.
Nga ana tjetër, Interi planifikon të përdorë të ardhurat nga shitja e Asllanit për të financuar blerjen e Ademola Lookman, ndërkohë që janë ende të interesuar për Giovanni Leonin për të forcuar mbrojtjen e drejtuar nga Cristian Chivu.
Pra, largimi i Asllanit është bërë një domosdoshmëri për zikaltrit.
