Marash Kumbulla dhe Roma duket se do të ndajnë rrugët gjatë merkatos së verës. Këtë herë jo me formulën e huazimit, si në edicionin e kaluar te Espanjol, por me shitjen e kartonit të mbrojtësit të Kombëtares shqiptare.
Për këtë duken të sigurt në kryeqytetin italaia, pasi “Il Tempo” ka bërë të ditur se ai nuk hyn në planet e trajnerit Xhanpiero Gasperini.
Ndaj ky i fundit e ka përfshirë në listën e lojtarëve që duhet të sakrifikohen në merkato për të zvogëluar numrin e futbollistëve në dispozicion dhe për të siguruar të ardhura për të blerë lojtarë me karakteristikat që dëshiron trajneri.
Nuk është bërë ende i ditur emri i ndonjë klubi të interesuar për mbrojtësin shqiptar, por “Il Tempo” sqaron se largimi i tij nga Roma pritet brenda përfundimit të fazës përgatitore që klubi po bën në Trigoria.
