Kosova po përballet me një situatë alarmante për shkak të zjarreve që kanë përfshirë gjithë territorin e vendit. Vetëm gjatë javës së fundit janë regjistruar mbi 320 vatra zjarri, ndërsa si pasojë kanë humbur jetën dy persona.
Një zjarrfikës nga Gjakova dhe një qytetar nga komuna e Klinës janë viktimat e fundit të këtyre zjarreve të shumta. Lajmin e bëri të ditur Agjencia për Menaxhim të Emergjencave gjatë një konference për media.
Drejtori Ekzekutiv i Agjencisë, Genc Metaj, tha se zjarret po përhapen në të gjithë vendin dhe paralajmëroi për rreziqe serioze nëse nuk merren masa urgjente dhe nuk rritet vetëdijesimi qytetar. Aktualisht janë shtatë zjarre aktive, për të cilat po punohet për fikjen e tyre.
Në fund të kësaj jave, temperaturat në Kosovë pritet të arrijnë deri në 39 gradë Celsius, duke rritur rrezikun e përhapjes së zjarreve.
