Në sezonin e ri, Tirana ka shansin të luajnë në kryeqytet, në stadiumin e tyre “Selman Stërmasi”, derisa ky i fundit të prishet. Si fusha, dhe ambientet e brendshme, janë rregulluar dhe në këto kushte, bardheblutë nuk kanë pse të migrojnë nëpër Shqipëri.
Gjithsesi, në FSHF bëjnë me dije se, që Tirana të luajë në “Selman Stërmasi”, nuk është aq e thjeshtë. Klubi duhet të investojë për të rregulluar rrethimin e jashtëm dhe të brendshëm, që skuadra të marrë licencën për të luajtur në “Selman Stërmasi”.
Po kështu janë për t’u verifikuar edhe disa çështje të tjera teknike për mbarëvajtjen sa më mirë të takimit. Nëse Tirana rregullon rrethimin e jashtëm e të brendshëm deri në nisje të kampionatit, atëherë Tirana mund të luajë në këtë stadium.
Tirana e mbylli kampionatin në vendin e tetë, por një nga faktorët e krizës së rezultateve është fakti se skuadra ka luajtur vetëm 10 nga 38 takimet në kryeqytet.
Kalendari, pa ndeshjet e Europës, llogariste 20 ndeshje si pritës dhe 18 si udhëtues. Fakt është që Tirana ka zhvilluar 27 takime jashtë Tiranës, dhe 11 në kryeqytet, përfshirë katër derbet.
