Gjykata e Tiranës ka zbardhur vendimin për masën e sigurisë ndaj dy vëllezërve Agim dhe Florenc Domi, të arrestuar pas sekuestrimit të një sasie të madhe ushqimesh të skaduara në magazinën e kompanisë “Master AL” në Vorë.
Në vendimin e datës 21 korrik 2025, Gjykata e Shkallës së Parë e Juridiksionit të Përgjithshëm, bazuar në kërkesën e Prokurorisë, ka vlerësuar si të ligjshëm arrestimin në flagrancë të dy të dyshuarve dhe ka vendosur masën e sigurisë “arrest në shtëpi” për të dy.
Agim Domi, administrator i magazinës, dhe Florenc Domi, magazinier, do të hetohen në gjendje të lirë me detyrimin për të mos u larguar nga banesat e tyre. Masa e caktuar parashikon mbikëqyrje të vazhdueshme nga Policia Gjyqësore për zbatimin e urdhrit të Gjykatës.
Sipas vendimit të zbardhur, dy vëllezërit janë nën hetim për veprën penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”, parashikuar nga neni 288/1 i Kodit Penal.
Në seancën gjyqësore, të pandehurit pretenduan se produktet nuk ishin destinuar për treg, por për t’u asgjësuar, sapo të siguroheshin kushtet financiare për këtë proces. Megjithatë, Prokuroria dhe policia dyshojnë se mallrat do të përfundonin sërish në treg me etiketa të falsifikuara.
Hetimet janë pjesë e operacionit “Siguria Ushqimore”, që çoi në sekuestrimin e 716 kolive dhe dhjetëra kilogramëve produkte ushqimore, përfshirë kroasantë dhe fruta të thata të skaduara që prej 7 muajsh. Etiketat e produkteve dyshohet se ishin manipuluar për të fshehur afatet reale të skadencës.
Ndërkohë, pronari i kompanisë “Master AL”, Skifter Tagani, po hetohet në gjendje të lirë. Ai akuzohet se ka grumbulluar ushqime të skaduara nga tregje në Tiranë, Elbasan, Durrës dhe nga jashtë vendit, për t’i ripaketuar dhe hedhur në treg si produkte të rregullta.
Hidhnin në treg ushqime të skaduara, lirohen nga burgu dy punonjësit e Skifter Taganit
