Ish-zëvendësministri i Financave, Sherefedin Shehu, ngriti alarmin për drejtimin ku po shkon ekonomia shqiptare, gjatë një interviste në emisionin “Log.” në News24. Ai deklaroi se ndërtimi, i cili sot është kontribuesi kryesor në GDP, është sektori ku përqendrohen shumica e parave të pista, duke lënë në hije sektorët e tjerë strategjikë.
“Ka analiza dhe dokumente, madje edhe nga historia e mafies, që tregojnë se 90% e parave të pista shkojnë në ndërtim. Këtë e shohim edhe te ne, ku dominon ndërtimi dhe rritja e tij artificiale, ndërkohë që bujqësia dhe industria po bien ndjeshëm”, tha Shehu.
Sipas tij, Shqipëria po përballet me një ekonomi që është gjithnjë e më e varur nga sektori informal dhe që po shkon drejt një modeli jo të qëndrueshëm.
Sherefedin Shehu: “Ne jemi në një situatë ku po shikojmë kullat. Ka statistika dhe analiza historike, sidomos nga historia e mafies, që 90% e parave të pista shkojnë në ndërtim. Kjo është e konfirmuar në shumë dokumenta dhe analiza. Kontribuesin në GDP kemi ndërtimin, kemi rënie të industrisë dhe bujqësisë, ku çelësi i zhvillimit është manifaktura ose modelet ekonomike.
Tjetër, kemi një parashikim të zymtë për ekonominë. FMN në parashikimet e muajit prill thotë se do të ketë rritje në 3.5%, ndërkohë që synimi në vendet e varfëra është të shkojë rreth 7%, që të ndikojë në mirëqënien e qytetarëve. Pra, kemi një ekonomi që po shkon në trend rënës, sidomos me mungesën e sektorëve kyç të ekonomisë. Kjo do të thotë se ekonomia dominohet nga pjesa informale që ka ndikuar në një sektor, i cili jep efekt ‘one time’ (menjëhershëm), por pastaj shtëpia nuk jep bukë për të ngrënë.”
