Policia italiane në Bolzano ka arrestuar një 20-vjeçar shqiptar, me inicialet B.K., i dyshuar për trafik droge. Ai u ndalua nga patrullat e policisë në zonën “Rruga Innsbruck”, pasi u vu re në një makinë të dyshimtë dhe me sjellje të nervozuara gjatë një bisede telefonike.
Pas ndjekjes në fshehtësi, ai u ndal në një pikë karburanti pranë teleferikut Colle, ku tentoi të largohej, por u ndalua nga oficerët. Gjatë kontrollit të makinës, policia gjeti në një ndarje të fshehur në pjesën e pasme një pako me mbi një kilogram kokainë.
I riu, rezident në Emilia Romagna, u arrestua për posedim të lëndëve narkotike me qëllim shitjen dhe u dërgua në burgun e Bolzanos.
Policia italiane ka bërë të ditur se ky është një nga disa operacione të zhvilluara së fundmi në provincë, ku gjatë muajit të fundit janë arrestuar 10 persona dhe janë sekuestruar mbi 7 kg drogë dhe 60 mijë euro cash.
