Bylisi ka ndërprerë me konsensus bashkëpunimin me Gentian Mezanin, duke e larguar këtë të fundit në mesin e përgatitjeve për sezonin e ri.
Ashtu siç shpjegohet nga klubi, lëvizja ka ardhur për shkak të impenjimeve familjare, ndërkohë që klubi ka arritur akordin për të ulur në stol Mirel Josën.
Tekniku me më shumë trofe në historinë e futbollit shqiptar do të udhëheqë skuadrën mallakastriote në sezonin e ardhshëm.
Për Josën, Bylisi përfaqëson kapitullin e 21-të në karrierën e tij mbi dy dekada, ku ka regjistruar rezultate shumë të mira, kulmuar me rekordin prej 12 trofesh të fituar: 5 tituj kampion, 4 Kupa dhe 3 Superkupa.
“Trajneri i ri do të prezantohet para skuadrës dhe do të nisë menjëherë nga puna. I urojmë mirëseardhjen trajnerit të ri Mirel Josa, ndërkohë që falënderojmë Gentian Mezanin për punën e mirë që ka bërë në skuadrën tonë!”, thuhet në njoftimin e klubit të Bylisit.
Sezonin e kaluar, ballshiotët shmangën rënien në Kategorinë e Parë vetëm në javët e fundit të Superligës.
Ndërsa këtë edicion, Bylis synon të bëjë më mirë, me ndryshimet në pankinë që pritet të sjellin revolucion jo vetëm në organikën e skuadrës, por edhe në skemën dhe lojën që do të aplikohet në fushën e blertë
